شام سے امن کیلئے غیر فوجی حفاظتی زون قائم کرنا ہوگا، نیتن یاہو

تل ابیب: اسرائیلی وزیرِ اعظم بنیامین نیتن یاہو نے کہا ہے کہ شام کے ساتھ معاہدہ ممکن ہے، جس کے لیے دمشق سے جبل الشیخ تک غیر فوجی حفاظتی زون قائم کرنا ضروری ہے۔ نیتن یاہو نے یہ بیان اسرائیل کے مرکزی علاقے میں زخمی فوجیوں سے ملاقات کے دوران دیا۔ اسرائیلی وزیراعظم کے مطابق توقع ہے کہ شام غیر فوجی حفاظتی زون قائم کرے، جس میں جبل الشیخ کے پہاڑ اور ہرمون کے علاقوں تک کے اطراف شامل ہوں۔
یہ تبصرہ امریکی صدر ڈونلڈ ٹرمپ کے اس بیان کے ایک دن بعد آیا کہ وہ چاہیں گے کہ شام اور اسرائیل کے درمیان دیرپا اور خوشحال تعلقات قائم ہوں۔ اسرائیل اور شام کے درمیان سکیورٹی معاہدے پر کئی مہینوں سے بات چیت جاری ہے، تاہم حالیہ ہفتوں میں اس میں بہت کم پیش رفت ہوئی ہے۔ نیتن یاہو نے کہا کہ بفرزون کا قیام علاقے میں امن اور سرحدی تحفظ کو یقینی بنانے کے لیے ضروری ہے۔