غزہ جنگ میں 2 لاکھ سے زائد فلسطینی قتل اور زخمی کئے، سابق اسرائیلی آرمی چیف کا اعتراف

تل ابیب: اسرائیلی فوج کے سابق چیف آف اسٹاف ہرزے حلوی نے اعتراف کیا ہے کہ غزہ میں جاری خون ریز جنگ کے دوران فوج نے دو لاکھ سے زیادہ فلسطینی شہید اور زخمی کردئے ہیں۔ جنوبی اسرائیل کے رہائشیوں سے بات کرتے ہوئے ہرزے حلوی نے انکشاف کیا کہ غزہ کے 22 لاکھ باشندوں میں سے 10 فی صد سے زیادہ شہید اور زخمی ہوئے ہیں۔ انہوں نے کہا کہ یہ کوئی نرم جنگ نہیں ہے۔ ہم نے پہلے ہی منٹ سے دستانے اتار لیے۔ اسرائیل کو 7 اکتوبر کے حملے سے پہلے ہی غزہ کے حوالے سے زیادہ سخت رویہ اپنانا چاہیے تھا۔ انہوں نے کہا کہ قانونی مشاورت نے کبھی ان کے فوجی فیصلوں یا ان کے ماتحت کمانڈروں کے فیصلوں پر اثر نہیں ڈالا۔
انھوں نے یہ بھی کہا کہ فوجی وکلاء کی اصل اہمیت بیرونی دنیا کو قائل کرنے میں ہے کہ اسرائیلی فوج کی کارروائیاں قانونی ہیں۔