بھارت میں اقلیتوں کیلئے آواز اٹھانے کے جرم میں ایمنسٹی انڈیا کے پیسے ضبط

نئی دہلی : ہندوستان کے انفورسمنٹ ڈائریکٹوریٹ نے ایمنسٹی انڈیا کے ایک کروڑ چوون لاکھ روپے ضبط کرلئے۔ ای ڈی نے عبوری طور پر انڈینس فار ایمنسٹی انٹرنیشنل ٹرسٹ اکاؤنٹس میں موجود رقم انسدادِ منی لانڈرنگ قانون کے تحت ضبط کی ہے۔ انفورسمنٹ ڈائرکٹوریٹ نے سی بی آئی کی جانب سے درج ایف آئی آر کی بنیاد پر ایمنسٹی انڈیا کے خلاف منی لانڈرنگ کی تحقیقات شروع کردی ہیں۔ تحقیقات سے پتہ چلا کہ لائسنس منسوخ ہونے کے بعد ایمنسٹی اداروں نے بیرونی ممالک سے رقم وصول کرنے کا نیا طریقہ اختیار کیا۔ ایمنسٹی انٹرنیشنل یو کے نے خدمات برآمد کرنے اور سرمایہ کاری کے نام پر 51 کروڑ 74 لاکھ روپے بھیجے، لیکن ایسی خدمات برآمد کرنے کا کوئی دستاویزی ثبوت موجود نہیں تھا۔ ایمنسٹی انڈیا اقلیتوں کے خلاف آواز اٹھانے پر مودی سرکار کے زیر عتاب ہے۔