ڈنمارک میں بھی قرآن سوزی، عراقیوں کا گرین زون میں احتجاج

بغداد : سوئیڈن کے بعد ڈنمارک میں بھی قرآن جلانے پر عراقی مظاہرین نے بغداد کے گرین زون پر دھاوا بول دیا۔ ڈنمارک کے دارالحکومت کوپن ہیگن میں عراقی سفارتخانے کے سامنے قرآن اور عراقی پرچم جلانے پر عراقی عوام نے شدید احتجاج کیا۔ مذہبی رہنما مقتدیٰ الصدر کے ہزاروں حامی بغداد کے سفارتخانوں اور حساس سرکاری عمارتوں پر مشتمل گرین زون کے قریب جمع ہوئے اور شدید احتجاج کیا۔ مظاہرین نے ہاتھوں میں قرآن اور قومی پرچم اٹھارکھے تھے۔ مظاہرین نے ڈنمارک کے سفارتخانے پر احتجاج کیلئے گرین زون میں داخل ہونے کی کوشش کی تو پولیس نے انہیں آگے بڑھنے سے روک دیا۔ مظاہرین نے گرین زون کی طرف جانے والے جمھوریہ پل کو بلاک کر دیا۔ عراقی حکومت نے کہا کہ وہ سوئیڈن کے سفارت خانے پر حملے کی تکرار کی اجازت نہیں دینگے۔