استنبول کانفرنس، غزہ سے اسرائیلی فوج کے انخلا کا مطالبہ

استنبول : مسلمان ممالک نے استنبول کانفرنس میں اسرائیلی افواج کے انخلا اور فلسطینی علاقوں میں فوری انسانی امداد کی فراہمی کا مطالبہ کیا ہے۔ ترکیہ کی میزبانی میں غزہ کی صورتحال پر عرب و اسلامی ممالک کے وزرائے خارجہ کی کانفرنس میں شرکا نے غزہ میں جنگ بندی پر عملدرآمد پر زور دیا ہے۔
کانفرنس کے بعد جاری اعلامیے میں زور دیا گیا ہے کہ غزہ کا نظم و نسق فلسطینیوں کے ہاتھ میں دیا جائے، اسرائیل فوری طور پر جنگ بندی کی مکمل پاسداری کرے اور انسانی امداد کی راہ میں حائل تمام رکاوٹیں ختم کی جائیں۔ مشترکہ اعلامیے میں کہا گیا کہ فلسطینی عوام کے حقِ خود ارادیت اور قومی نمائندگی کو تسلیم کیے بغیر خطے میں پائیدار امن ممکن نہیں۔ شریک ممالک نے بین الاقوامی استحکام فورس کے قیام پر غور کرنے پر اتفاق کیا تاکہ جنگ بندی کی نگرانی اور انسانی امداد کی فراہمی مؤثر بنائی جا سکے۔
اجلاس میں انڈونیشیا، پاکستان، سعودی عرب، اردن، قطر اور متحدہ عرب امارات کے وزرائے خارجہ یا نمائندوں نے شرکت کی۔