اسرائیلی بیرون ملک بھاگنے لگے، ایک ماہ میں دو لاکھ 30 ہزار صیہونی فرار

تل ابیب : حماس کے حملے اور غزہ جنگ میں خود کو غیر محفوظ سمجھنے والے اسرائیلی ملک چھوڑ کر بھاگنے لگے، اسرائیلی محکمہ امیگریشن اینڈ پاپولیشن کے سرکاری اعداد و شمار کے مطابق طوفان الاقصیٰ کے آغاز اور غزہ کے محاذ پر لڑائی میں شدت آنے کے بعد سے اب تک 2 لاکھ 30 ہزار سے زیادہ اسرائیلی ملک چھوڑ چکے ہیں۔ اسرائیل میں سوشل میڈیا پر جاری مہم ہم ایک ساتھ ملک چھوڑیں گے نے لوگوں سے اسرائیل چھوڑنے کا مطالبہ کرتے ہوئے اپنی سرگرمیاں تیز کردی ہیں۔ مہم نے سوشل میڈیا کے ذریعے اسرائیلی خاندانوں سے مطالبہ کیا ہے کہ وہ دنیا بھر میں کسی پرامن منزل کی تلاش کریں۔ عارضی رہائش یا استحکام کے لیے، ملازمت کے مواقع فراہم کرنے اور تجارتی منصوبوں میں سرمایہ کاری کے لیے کسی پرامن ملک میں جائیں ۔ مہم نے سوشل میڈیا پلیٹ فارمز پر اسرائیل چھوڑنے کے خیال کو بھی فروغ دینا شروع کیا۔