رفح پر اسرائیلی حملے کا مشرق وسطیٰ پر تباہ کن اثر ہوگا، قطر

دوحہ : قطر نے رفح پر اسرائیلی حملے کو روکنے کیلئے عالمی برادری سے عملی اقدامات کا مطالبہ کیا ہے۔ قطری وزیراعظم محمد بن عبدالرحمان نے کہا ہے کہ رفح پر اسرائیلی حملے کا نتیجہ مشرق وسطیٰ میں تباہی ہوگا۔ انہوں نے کہا کہ غزہ میں قتل عام پر عربوں میں شدید غصہ پایا جاتا ہے۔ اگر رفح میں قتل عام ہوا تو پھر عربوں کے غصے کو کنٹرول کرنا مشکل ہوجائے گا۔ قطری وزیر اعظم نے متنبہ کیا کہ اس سے ایک ایسا آتش فشاں پھٹ سکتا ہے جو خطے میں خون اور آگ پھیلائے گا۔ قاہرہ روانگی سے قبل قطری وزیراعظم نے کہا کہ خطے کے ممالک بھرپور کوشش کررہے ہیں کہ تباہی کو روکا جائے لیکن ایسا لگتا ہے کہ عالمی برادری کو غزہ میں ہونے والی خونریزی کے دوررس سنگین نتائج کا احساس نہیں ہے۔ انہوں نے کہا کہ حماس نے انہیں سنجیدگی سے جنگ بندی شرائط پر غور کا یقین دلایا ہے اور انہیں امید ہے کہ اسرائیل بھی سنجیدگی کا مظاہرہ کرتے ہوئے امن کی بحالی کی کوششوں میں تعاون کرے گا۔ انہوں نے زور دیا کہ فلسطین کے مسئلے کے مستقل حل کے لیے دو ریاستی حل کو قابل عمل بنانا اس وقت بہت ضروری ہے۔