Raza Musani 
کوپن ہیگن : ڈنمارک میں اسلامو فوبیا عروج پر پہنچ گیا۔ مسلسل تیسرے روز اسلام دشمنوں نے قرآن کو نذر آتش کردیا۔ ڈنمارک کے دارالحکومت کوپن ہیگن میں الٹرا نیشنلسٹ گروپ ڈانسک پیٹریاٹس کے ارکان دوسرے دن بھی ترک سفارتخانے کے سامنے پہنچے اور پولیس کی حفاظت میں انتہاپسندوں نے قرآن مجید کا نسخہ نذر آتش کردیا۔ انتہا پسندوں نے اسلام کے خلاف نعرے لگائے ۔اسلام مخالف بینرز لہرائے اور ترکی کی مصنوعات کے بائیکاٹ کا مطالبہ بھی کیا۔ اسی گروپ نے منگل کو بھی ترک سفارت خانے کے سامنے قرآن پاک کا نسخہ جلایا۔ اس سے قبل پیر کو بھی اسی گروپ نے سعودی سفارتخانے کے سامنے قرآن کا نسخہ جلایا تھا۔ انتہاپسندوں نے اپنے گھناؤنے فعل کو سوشل میڈیا پر لائیو نشر کرتے ہوئے اسلامو فوبک نعرے لگائے۔
ڈنمارک کی سات اپوزیشن جماعتوں نے حکومت کی جانب سے قرآن مجید کے نسخوں کو جلانے کو غیر قانونی قرار دینے کی کوششوں پر شدید اعتراض کیا ہے اور کہاکہ آزادی اظہار پر پابندی کی کوئی بھی قانون سازی ناقابل قبول ہوگی۔
