اسلام آباد : علامہ شہنشاہ نقوی کو چوتھی مجلس سے بھی خطاب نہیں کرنے دیا گیا

اسلام آباد : علامہ سید شہنشاہ نقوی کو اسلام آباد میں انتظامیہ نے حفاظتی تحویل میں لے لیا اور اُنہیں جی سکس 2 کی مرکزی امام بارگاہ سے ساتھ لے جاکر رہائش گاہ پر چھوڑ دیا۔ مولانا کو حفاظتی تحویل میں لینے کی وجہ سے شہر میں ان کی گرفتاری کی خبر پھیل گئی اور عزاداروں کی بڑی تعداد ڈی چوک پہنچ گئی رات گئے علامہ کا آڈیو پیغام جاری ہوا جس کے بعد دھرنا ختم کرکے عزادار واپس لوٹ گئے، علامہ شہنشاہ حسین نقوی نے آڈیو پیغام میں قوم کو اپنی خیریت سے آگاہ کیا اور پرامن رہنے کی اپیل کی، انہوں نے کہا کہ مجھے اسلام آباد میں 5 مجالس عزا سے خطاب کرنا تھا میں نے 2 مجالس سے خطاب کیا لیکن اس کے بعد 2 مجالس مجھے نہیں پڑھنے دی گئیں بلکہ مجھے ایک جگہ مہمان بنا کر لے گئے ،انہیں کسی قسم کی بےاحترامی یا توہین کا سامنا نہیں کرنا پڑا ، انہوں نے کہا کہ میں یاتو اسلام آباد میں خمسہ مجالس کی پانچویں مجلس سے خطاب کروں گا یا کراچی پہنچ جاؤں گا۔