Raza Musani 
واشنگٹن : امریکی حکام نے دعویٰ کیا ہےکہ بین الاقوامی استحکام فورس یا آئی ایس ایف غزہ میں حماس کے خلاف نہیں لڑے گی۔ غزہ میں اقوام متحدہ کی منظوری سے ایک بین الاقوامی استحکام فورس کی تعیناتی پر غور کیا جا رہا ہے، جو آئندہ ماہ ہی ممکن ہوسکتی ہے۔امریکی حکام کے مطابق اس فورس کا مقصد لڑائی نہیں بلکہ صورتحال کو مستحکم کرنا ہوگا۔ امریکی حکام نے بتایا ہے کہ غزہ میں بین الاقوامی فوجی دستوں کو تعینات کرنے کی تیاری جاری ہے جو اقوام متحدہ کے تحت استحکام فورس کے طور پر کام کریں گے۔ امریکی حکام کا کہنا ہے کہ متعدد ممالک نے اس فورس میں شمولیت میں دلچسپی ظاہر کی ہے۔اس وقت فورس کے حجم، ساخت، رہائش، تربیت اور قواعدِ کار طے کیے جا رہے ہیں۔
امریکی سینٹرل کمانڈ سولہ دسمبر کو دوحہ میں شراکت دار ممالک کے ساتھ ایک کانفرنس منعقد کرے گی۔ اس کانفرنس میں غزہ کے لیے مجوزہ بین الاقوامی استحکام فورس کی منصوبہ بندی کو حتمی شکل دینے پر غور کیا جائے گا۔
