بھارت کا عدم تعاون، افغان سفارتخانہ بند، تمام سرگرمیاں معطل

نئی دہلی: بھارت میں افغانستان کے سفارت خانے نے تمام سرگرمیاں بند کرنے کا اعلان کر دیا۔ افغان سفارت خانے نے وزارت خارجہ کو لکھے گئے خط میں کہا ہے کہ افغان سفارت خانہ بند کرنے کی وجہ ہندوستان کا عدم تعاون ہے۔ ہندوستان افغان مفادات کے لیے خدمات کی توقعات پوری کرنے میں ناکام رہا۔ خط میں افغان سفارت خانے نے کہا ہے کہ عملے اور وسائل میں کمی سے آپریشن جاری رکھنا چیلنجنگ ہو رہا ہے، سفارت کاروں کے لیے ویزہ تجدید بر وقت نہ ہونا بھی معطلی کی وجوہات میں شامل ہے۔ افغان سفارت خانے کی جانب سے کہا گیا ہے کہ بھارت سفارت خانے کا کنٹرول ایک نگراں کی حیثیت سے سنبھالے گا۔ غیر ملکی خبر رساں ادارے کے مطابق حالیہ مہینوں میں افغان سفیر اور دیگر سینئر سفارت کار ہندوستان سے بیرونِ ملک منتقل ہوئے ہیں۔ یہ خبریں بھی گردش کر رہی تھیں کہ افغان سفیر اور دیگر سینئر سفارت کار یورپ اور امریکا میں پناہ ملنے پر منتقل ہوئے۔