بحرین میں نئے اسرائیلی سفارتخانے کا افتتاح، تعلقات بڑھانے پر اتفاق

مناما : صیہونی حکومت نے تعلقات کے قیام کے تین سال بعد بحرین میں اپنا نیا سفارتخانہ کھول لیا۔ صیہونی وزیر خارجہ ایلی کوہن اپنے پہلے دورے پر بحرین کے دارالحکومت مناما پہنچے اور نئے سفارتخانے کا افتتاح کیا۔ انہوں نے اپنے بحرینی ہم منصب عبداللطیف الزیانی کے ساتھ ملاقات میں تجارتی تعلقات کو فروغ دینے پر اتفاق کیا۔ ایلی کوہن نے کہا کہ دونوں ممالک نے اس بات پراتفاق کیا کہ ہمیں براہ راست پروازوں کی تعداد، سیاحت، تجارتی حجم، سرمایہ کاری کو بڑھانے کے لیے مل کر کام کرنا چاہیے۔ عبداللطیف الزیانی نے کہا کہ نیا سفارت خانہ دونوں ممالک کے درمیان بڑھتے ہوئے تعاون میں ایک اہم کردار ادا کرے گا۔ انہوں نےکہاکہ دوطرفہ بات چیت میں معاشی، سرمایہ کاری، تجارت اور دیگر شعبوں میں تعاون کو وسیع کرنے پر اتفاق ہوا ہے۔