سردیوں سے پہلے پناہ گاہوں کا سامان غزہ نہ پہنچا تو صورتحال بگڑ جائے گی، اقوام متحدہ

جنیوا : اقوامِ متحدہ نے خبردار کیا ہے کہ اگر سردیوں سے پہلے پناہ گاہوں کا سامان غزہ میں نہ پہنچا تو صورتحال مزید خراب ہوجائے گی۔
اقوامِ متحدہ کے ترجمان فرحان حق نے بتایا کہ جنگ بندی کے بعد سے خاندان ان کھلے علاقوں میں منتقل ہو رہے ہیں جو دس اکتوبر کی جنگ بندی کے بعد قابل رسائی ہوئے ہیں۔ ان علاقوں میں خیمے اور کمبل فراہم کرنا ضروری ہے۔ انہوں نے کہا کہ اب تک اقوامِ متحدہ کی ایجنسیاں اور شراکت دار تنظیمیں محدود سامان کی ہی اجازت حاصل کر پائی ہیں۔ موسم سرما شروع ہونے سے قبل زیادہ مقدار میں امدادی سامان داخل کرنے کی اجازت دینی ہوگی۔
ادھر اقوام متحدہ کے عالمی غذائی پروگرام (ڈبلیو ایف پی) نے کہا ہے کہ غزہ میں داخل ہونے والاامدادی سامان روزانہ کے ہدف دو ہزار ٹن سے بہت کم ہے، جس سے لاکھوں متاثرین کی بنیادی غذائی ضروریات پوری کرنا مشکل ہو گیا ہے۔ تمام بارڈر کراسنگز استعمال کیے بغیر امداد کا مطلوبہ مقدار تک پہنچنا ممکن نہیں۔