ٹھوس اقدامات نہ کئے تو اسرائیل پورا فلسطین ہڑپ لے گا، اقوام متحدہ

اقوام متحدہ کے ماہرین نے خبردار کیا ہے کہ عالمی برادری نے ٹھوس اقدامات نہ کئے تو صیہونی حکومت پورے مقبوضہ فلسطین کو اسرائیل میں ضم کرلے گی۔ اقوام متحدہ کے ماہرین نے مقبوضہ مغربی کنارے میں صیہونی بستیوں کی تعمیر اور فلسطینی اراضی کے اسرائیل میں جبری الحاق پر رپورٹ جاری کی ہے۔ رپورٹ میں کہا گیا ہے کہ صیہونی حکومت نے مشرقی یروشلم کے غیر قانونی الحاق کے بعد اب مغربی کنارے کے بڑے حصے پر توجہ مرکوز کررکھی ہے۔ اس سے واضح ہوتا ہے کہ بین الاقوامی قوانین کی خلاف ورزی کرتے ہوئے پورے مقبوضہ فلسطینی علاقے کے الحاق کی ٹھوس کوشش کی جا سکتی ہے۔ رپورٹ میں عالمی برادری پر زور دیا گیا ہے کہ اسے مقبوضہ مغربی کنارے کے اسرائیل سے الحاق کو روکنے کے لیے اقدامات کرنے چاہئیں۔ ماہرین نے کہا ہے کہ فلسطینیوں اور اسرائیلیوں دونوں کے لیے ایک منصفانہ اور پائیدار امن کے لیے بین الاقوامی قانون کو دوہرے معیار کے بغیر برقرار رکھا جانا چاہیے تاکہ تشدد کا یہ چکر ختم ہوسکے۔ انہوں نے اقوام متحدہ کے رکن ممالک پر زور دیا کہ وہ ان غیر قانونی کارروائیوں کے خاتمے کے لیے دستیاب قانونی ذرائع کا استعمال کریں۔