Raza Musani 
تہران : ایران نے کہا ہے کہ آئی اے ای اے نے اسرائیل کو ہمارے جوہری پروگرام کے بارے میں معلومات فراہم کیں۔
ایرانی جوہری ادارے کے سربراہ محمد اسلامی نے تہران میں کانفرنس سے خطاب میں کہا کہ اسرائیل نے پہلے دن اس مقام کو نشانہ بنایا جہاں آئی اے ای اے کی معاونت سے ٹیسٹنگ کا انتظام کیا گیا تھا۔ عین وہی حصہ نشانہ بنایا جانا اس بات کا ثبوت ہے کہ یہ حملہ انتہائی مخصوص معلومات کی بنیاد پر کیا گیا۔
علاوہ ازیں یمن کے المسیرہ چینل کو انٹرویو میں ایرانی جوہری ادارے کے سربراہ محمد اسلامی نے کہا کہ امریکہ اور اس کے اتحادی ایران کی سائنسی پیش رفت کے خلاف ایک نئے اور خطرناک مرحلے میں داخل ہو چکے ہیں۔ انہوں نے کہا کہ ایران کے پاس اس جارحیت کی نوعیت، ملوث فریقوں اور ان کے مقاصد کے ٹھوس شواہد موجود ہیں۔ جوہری ادارے کے سربراہ نے اس عزم کا اعادہ کیا کہ ایران اپنی قانونی اور سائنسی حقوق کا بھرپور دفاع کرے گا اور کسی فریق کو اپنی مرضی ایران پر مسلط نہیں کرنے دے گا۔
