امن فورس کو سلامتی کونسل سے منظوری دلوانا مشکل ہوگا، حماس

دوحہ: حماس کے سینئر رہنما موسیٰ ابو مرزوق نے کہا ہے کہ غزہ میں بین الاقوامی فوج تعینات کرنے کے امریکی منصوبے کو اقوام متحدہ کی سلامتی کونسل سے منظور کروانا مشکل ہوگا۔ الجزیرہ ٹی وی کو انٹرویو میں موسیٰ ابو مرزوق نے بتایا کہ ثالثوں نے اس بات پر زور دیا ہے کہ اگر غزہ میں کوئی بین الاقوامی فورس بنائی جاتی ہے تو اسے سلامتی کونسل کی منظوری لازمی حاصل ہونی چاہیے۔ لیکن امریکہ اور اسرائیل دونوں اس بات کے حامی نہیں کہ ایسی فورس اقوام متحدہ کے مینڈیٹ کے تحت قائم کی جائے۔ ابو مرزوق نے کہا کہ غزہ میں قابض فوج کی جگہ کوئی غیر ملکی عسکری قوت قبول نہیں کی جا سکتی۔ موسیٰ ابو مرزوق نے بتایا کہ فلسطینی دھڑوں میں اس بات پر اتفاق ہو چکا ہے کہ غزہ میں سیکیورٹی کی ذمہ داری صرف فلسطینی فورس کے سپرد ہوگی، جس کی قیادت غزہ انتظامی کمیٹی کرے گی۔