غزہ میں جامع جنگ بندی قبول کرنے کے لیے تیار ہیں، حماس

غزہ : حماس نے غزہ میں خونریز جنگ کے خاتمے کے لیے جامع جنگ بندی معاہدے پر آمادگی ظاہر کر دی ہے۔ حماس نے ایک بیان میں کہا کہ وہ غزہ میں ایک پائیدار اور مکمل جنگ بندی کے لیے تیار ہے۔ گروپ اب بھی ثالثوں کی طرف سے پیش کی گئی تجویز پر اسرائیل کے جواب کا منتظر ہے، جسے گروپ نے قبول کر لیا تھا۔ حماس نے غیر مسلح ہونے کی شرط کو مسترد کرتے ہوئے مؤقف اپنایا کہ یہ صرف آزاد فلسطینی ریاست کے قیام کے بعد ممکن ہو سکتا ہے۔ حماس نے کہا ہے کہ اس نے غزہ کو چلانے کے لیے ٹیکنوکریٹس کی ایک آزاد قومی انتظامیہ کی تشکیل پر اتفاق کیا ہے۔
اسرائیل نے اس پیشکش کو فوری طور پر مسترد کرتے ہوئے ایک بار پھر اپنے پرانے مؤقف کو دہرایا ہے۔ اسرائیلی وزیرِاعظم کے دفتر سے جاری بیان میں کہا گیا ہے کہ جنگ صرف انہی شرائط پر رک سکتی ہے جو اسرائیلی کابینہ نے مقرر کی ہیں جن میں تمام یرغمالیوں کی غیر مشروط رہائی اور حماس کا مکمل غیر مسلح ہونا شامل ہے۔