حماس کا وفد جنگ بندی پر بات چیت کے لیے مصر پہنچ گیا

قاہرہ : حماس کا ایک وفد جنگ بندی کے معاہدے پر مزید بات چیت کے لیے مصر پہنچ گیا ہے۔ جہاں مصر کی جانب سے پیش کی گئی اسرائیلی تجاویز پر بات چیت ہوگی۔ ثالثوں نے حماس کو نئی تجویز پیش کی ہے جس میں تمام قیدیوں کی رہائی۔ خواہ وہ زندہ ہوں یا مردہ کے بدلے فلسطینی قیدیوں کی رہائی اور حماس کے ہتھیار ڈالنے کا مطالبہ کیا گیا ہے۔
اسرائیلی نشریاتی ادارے کے مطابق نئی تجاویز میں غزہ سے اسرائیلی فوج کے انخلا کا نیا منصوبہ شامل کیا گیا ہے جس کی نگرانی عرب اور امریکی مشترکہ طور پر کریں گے تاکہ حماس کے ہتھیاروں کے معاملے اور غزہ کے انتظام کی شکل کیلئے مستقل حل تلاش کیا جاسکے۔ نشریاتی ادارے نے مزید کہا ہےکہ اس کے ساتھ ہی مستقل جنگ بندی معاہدے تک پہنچنے کیلئے مذاکرات جاری ہیں۔ ادارے نے دعویٰ کیا ہےکہ اسرائیلی وزیراعظم بنیامین نیتن یاہو اب جزوی معاہدوں کی تلاش میں نہیں ہیں اور اُنہوں نے جنگ کو جلد ختم کرنے اور غزہ پر کنٹرول حاصل کرنے کیلئے فوجی کارروائیوں کو تیز کرنے کا اعلان کیا ہے۔