زائرین کیلئے خوشخبری، بصرہ چلمجا ریلوے ٹریک کی تعمیرات کا آغاز

بغداد: عراق کے وزیراعظم محمد شیاع السودانی نے ایران سے ملانے والی پہلی ریلوے لائن کے تعمیراتی کام کا افتتاح کردیا ہے۔ بصرہ-چلمجا ریلوے لائن منصوبہ بصرہ شہر کو چلمجا سرحدی کراسنگ کے ذریعے ایران کے وسیع ریلوے نیٹ ورک سے منسلک کرے گا۔ منصوبے کی تکمیل میں 18 سے 24 ماہ لگیں گے۔ وزیر اعظم محمد شیاع السودانی نے اپنی تقریر میں کہا کہ اس کا مقصد ایران اور وسط ایشیائی ممالک کے زائرین کو مقدس شہروں تک لے جانے کے قابل بنانا ہے۔ محمد شیاع السودانی نے تہران کا شکریہ ادا کیا کہ اس نے ٹرین لائن کا راستہ صاف کرنے کے لیے سرحد پر کارروائیوں کی منصوبہ بندی کی اور شط العرب آبی گذرگاہ پر ریلوے پل تعمیر کیا، جہاں دریائے دجلہ اور فرات خلیج میں بہنے سے پہلے یکجا ہوتے ہیں۔ 32 کلومیٹر طویل ریلوے ٹریک کا نصف حصہ ایران کی سرحدی علاقے میں ہوگا۔