گلوبل وارمنگ، یورپ،امریکا،ایشیا میں شدید گرمی

روم: گلوبل وارمنگ قابو سے باہر ہو گئی۔ شمالی امریکا, یورپ اور ایشیا میں شدید گرمی اور تباہ کن بارشوں نے نظام زندگی درہم برہم کردیا۔ یورپ کے بیشتر ممالک ان دنوں شدید گرمی کی لپیٹ میں ہیں. اٹلی، یونان، جرمنی، اسپین، پولینڈ اور سوئٹزرلینڈ میں شدید گرمی کی لہر برقرار ہے۔ اٹلی کے شہروں سسلی اور سارڈینیا میں درجہ حرات ریکارڈ 49 ڈگری سینٹی گریڈ تک جاپہنچا۔ یونان بھر میں ہیٹ ویو ریڈ الرٹ کا اعلان کردیا گیا ہے۔ شدید گرمی کی وجہ سے اسپین کے جنگلوں میں آگ لگنے کے واقعات میں اضافہ ہوا ہے۔ شمالی امریکا بھی شدید گرمی کی لپیٹ میں ہے۔ کیلیفورنیا کی ڈیتھ ویلی میں پارہ 53 ڈگری سینٹی گریڈ ریکارڈ کیا گیا۔ جبکہ شمال مشرقی امریکا میں موسلا دھار بارش اور طوفان سے زندگی معطل ہوگئی۔ 2600 سے زائد فلائٹس منسوخ کرنا پڑیں۔ ایشیائی ممالک بھی موسمی تغیرات کا شکار ہیں۔ چین اور جاپان ہیٹ ویو کی لپیٹ میں ہیں۔ چینی صوبے سنکیانگ کے دور افتادہ سانباؤ ٹاؤن شپ میں درجہ حرارت 52.2 سینٹی گریڈ تک بڑھ گیا۔ دوسری جانب جنوبی کوریا۔ ہندوستان میں شدید بارشوں سے سیلاب آگیا ہے اور درجنوں افراد موت کے منہ میں چلے گئے۔