فلسطینیوں سے اظہارِ یکجہتی، پاکستان سمیت دنیا بھر میں مظاہرے اور ریلیاں، وائٹ ہاؤس کے باہر بھی احتجاج

واشنگٹن : فلسطینیوں سے یکجہتی کیلئے دنیا بھر مظاہرے اور ریلیاں نکالی گئیں۔ وائٹ ہاؤس کے سامنے بھی احتجاج کیا گیا۔
امریکا کے دارالحکومت واشنگٹن سمیت کئی شہروں میں فلسطین کے حامی ہزاروں افراد نے احتجاجی ریلیاں نکالیں۔ واشنگٹن میں مارچ کے شرکاء ’’آزاد فلسطین ‘‘ کے نعرے لگاتے ہوئے وائٹ ہاؤس کے سامنے سے گزرے۔ ریلی میں فلسطینی پرچموں کا سمندر دکھائی دیا۔ اس موقع پر مظاہرین نے اسرائیلی حملوں اور غزہ کی ناکہ بندی ختم کرنے کا مطالبہ کیا۔ لاس اینجلس ، نیویارک، ڈیربورن اور مشی گن میں بھی فلسطینیوں کے حق میں مظاہرے کئے گئے۔
پاکستان میں تحریک بیداری امت مصطفیٰ (ص) کے تحت نمائش تا سی بریز، کراچی ریلی نکالی گئی۔ کراچی میں جماعت اسلامی کے تحت بھی فلسطینیوں سے اظہارِ یکجہتی کے لیے عظیم الشان ریلی نکالی گئی۔
برطانیہ کے شمالی شہروں ایڈن برگ ، گلاسگو اور اسکاٹ لینڈ میں بھی فلسطینیوں سے اظہار یکجہتی کیلئے ریلیاں نکالی گئیں۔ سوئٹزرلینڈ کے دارالحکومت جنیوا۔ اٹلی کے شہر طورین اور آئرش دارالحکومت ڈبلن میں بھی مظاہرے کئے گئے اور فلسطینیوں کے حق میں ریلیاں نکالی گئیں۔ مراکش کے دارالحکومت رباط میں بھی ہزاروں افراد فلسطینیوں کے حق میں سڑکوں پر آگئے۔
انڈونیشیا کے دارالحکومت جکارتہ میں لاکھوں افراد نے فلسطینیوں کیساتھ یکجہتی کیلئے ریلیاں نکالیں۔ مظاہرین نے آزاد فلسطین کے بینرز اٹھا رکھے تھے۔