یورپ اسلامو فوبیا سے سنجیدگی اور مؤثر طریقے سے نمٹے، ایران

تہران : ایران نے یورپی یونین پر زور دیا ہے کہ وہ اسلامو فوبیا سے سنجیدگی اور مؤثر طریقے سے نمٹے۔ ایرانی وزیر خارجہ امیر عبداللہیان نے یورپی یونین کی خارجہ پالیسی کے سربراہ جوزف بورل سے ٹیلیفونک رابطہ کیا۔ دونوں رہنماؤں نے بین الاقوامی حالات اور دوطرفہ معاملات سمیت خطے کی صورتحال پر تبادلہ خیال کیا۔ امیر عبداللہیان نے سوئیڈن میں قرآن مجید کی توہین کے حالیہ واقعے پر یورپی یونین کی جانب سے اقدامات پر زوردیا اور کہاکہ یورپی ممالک میں اسلاموفوبیا کے واقعات سے دنیا بھر کے مسلمانوں کے جذبات کو شدید صدمہ پہنچا ہے۔ انہوں نے یورپی یونین پر زور دیا ہے کہ وہ اسلامو فوبیا کا سنجیدگی اور مؤثر طریقے سے مقابلہ کرے۔ اور اس سے نمٹنے کیلئے ٹھوس اقدامات اٹھائے۔ جوزف بورل نے کہا کہ قرآن مجید کی توہین کے واقعات یورپی یونین کی پالیسی کا حصہ نہیں ہیں۔ یورپی یونین توہین مذہب کے اقدامات اور توہین آمیز واقعات کی مذمت کرتی ہے۔