صمود فلوٹیلا میں شامل مرکزی کشتی پر ڈرون حملہ، آگ لگ گئی

تیونس: غزہ کے محصور فلسطینیوں کے لیے امداد لے جانے والے صمود فلوٹیلا میں شامل مرکزی کشتی پر تیونس کے پانیوں میں ڈرون حملہ کیا گیا جس سے آگ بھڑک اٹھی۔ صمود فلوٹیلا کی مرکزی کشتی پر سوار منتظمین نے بتایا کہ کشتی پر اس وقت حملہ کیا گیا جب وہ تیونس کے ساحلی شہر سیدی بوسعید بندرگاہ کے قریب پہنچی تھی۔ ڈرون حملے سے کشتی میں آگ لگ گئی اور اس کا کچھ حصہ جل گیا۔ تاہم کوئی جانی یا مالی نقصان نہیں ہوا جہاز کا عملہ محفوظ ہے۔
تیونس حکومت نے ڈرون حملے کی تردید کی ہے۔ نیشنل گارڈ کی جنرل ڈائریکٹوریٹ نے بتایا کہ آگ لگنے کی وجہ جہاز پر موجود ایک لائف جیکٹ تھی جس میں یا تو لائٹر یا سگریٹ کے باعث آگ لگی۔ کسی بھی قسم کے بیرونی حملے کا کوئی وجود نہیں ہے۔ گلوبل صمود فلوٹیلا کل غزہ کے لیے روانہ ہوگا۔