Raza Musani 
راولپنڈی : فارمیشن کمانڈرز کانفرنس میں کہاگیا کہ ذاتی مقاصد کے حصول کی خاطر مایوسی پیدا کرنے والے مخصوص عناصر کی کوششوں کو ثابت قدمی اور مثبت اقدامات کے تسلسل کے ذریعے پاکستانی عوام کی مکمل حمایت کے ساتھ شکست دی جائے گی۔ آئی ایس پی آر کے مطابق آرمی چیف جنرل عاصم منیر کی زیر صدارت 82 ویں فارمیشن کمانڈرز کانفرنس جنرل ہیڈکوارٹرز راولپنڈی میں منعقد ہوئی۔ فورم نے اس عزم کا اظہار کیا کہ پاکستان کو غیر مستحکم کرنے کے لیے دشمن قوتوں کے اشارے پر کام کرنے والے تمام دہشت گردوں، ان کے سہولت کاروں اور ان کی حوصلہ افزائی کرنے والے عناصر کے خلاف ریاست مکمل طاقت کے ساتھ نمٹے گی۔ درپیش چیلنجز کے باوجود گذشتہ چند ماہ کے دوران پاکستان میں اضطراب اور غیر یقینی صورت حال میں کمی ہوئی ہے جبکہ امید، اعتماد اور استحکام میں اضافہ نظر آیا ہے۔ فارمیشن کمانڈرز کانفرنس کے مطابق معیشت کی پائیدار بحالی، اسمگلنگ، ذخیرہ اندوزی، بجلی چوری، وَن ڈاکومنٹ رجیم کے نفاذ اور غیر قانونی غیر ملکیوں کی باوقار وطن واپسی کے لیے اقدامات کی حمایت کی۔ فورم نے قومی ڈیٹابیس کی حفاظت سمیت غیر قانونی سرگرمیوں کو روکنے کے لیے مختلف شعبوں میں حکومتی اقدامات کی مکمل حمایت کا اعادہ کیا۔ فارمیشن کمانڈرز کانفرنس نے کہا کہ فوج پائیدار استحکام اور سلامتی کے سفر میں قوم کا دفاع اور خدمت جاری رکھے گی۔
