ڈنمارک میں عوامی مقامات پر قرآن مجید جلانے پر پابندی کے قانون کا مسودہ تیار

کوپن ہیگن : ڈنمارک حکومت نے عوامی مقامات پر قرآن جلانے پر پابندی کے قانون کا مسودہ تیار کرلیا۔ ڈنمارک کے وزیر انصاف پیٹر ہملگارڈ نے نیوز کانفرنس میں بتایا کہ مجوزہ قانون اسی ضابطے کے مطابق بنایا گیا ہے جس کے تحت دوسرے ممالک کے جھنڈوں کی بے حرمتی کی ممانعت ہے۔ انہوں نے کہاکہ بل کا مقصد عوامی مقامات پر مذہبی چیزوں کی بےحرمتی کو روکنا ہے۔ نئے قانون کے تحت قرآن پاک کو جلانے پر جرمانہ یا دو سال تک قید کی سزا ہوگی۔ اُنہوں نے کہا کہ قرآن جلانے کا تسلسل توہین آمیز فعل تھا جس کا مقصد تنازعہ اور نفرت کو ہوا دینا تھا۔ انہوں نے مزید کہا کہ کچھ افراد کی پرتشدد اور ردعمل بھڑکانے کی کوششوں کو ہاتھ پر ہاتھ رکھ کر نہیں دیکھ سکتے تھے۔ ڈنمارک کے وزیر خارجہ لارس لوکے راسموسن نے کہا کہ یہ اقدام باقی دنیا کو ایک اہم سیاسی اشارہ بھیجتا ہے۔