غزہ پر قبضہ کا معاملہ عالمی اداروں میں لے جانے کا فیصلہ

مقبوضہ بیت المقدس: فلسطینی حکومت نے غزہ پر قبضہ کا معاملہ عالمی اداروں میں لے جانے کا فیصلہ کرلیا۔ حماس نے اسرائیلی منصوبہ جنگی جرم قرار دے دیا۔
فلسطینی ایوان صدر نے ایک بیان میں کہا ہےکہ غزہ پر قبضے کے اسرائیلی فیصلے کو اقوام متحدہ کی سلامتی کونسل، عرب لیگ اور اسلامی تعاون تنظیم (او آئی سی) کے سامنے لایا جائے گا۔ بیان میں کہا گیاہے کہ اسرائیلی منصوبہ نسل کشی، منظم قتل، فاقہ کشی اور محاصرے کی وسیع پالیسی کا تسلسل ہے۔
حماس نے کہا کہ اسرائیل کا قبضے کے بجائے کنٹرول کی اصطلاح کا استعمال شہریوں کے خلاف اپنے وحشیانہ جرم کے نتائج کی قانونی ذمہ داری سے بچنے کی کوشش ہے۔ حماس نے اسرائیلی حکومت پر غزہ میں قید اسیروں کی قسمت کی پرواہ نہ کرنے کا الزام بھی لگایا اور کہاکہ انہیں احساس ہے کہ جارحیت کو بڑھانے کا مطلب قیدیوں کی قربانی دینا ہے۔