فی الحال اناج معاہدے میں واپسی کا امکان نہیں ہے، روس

ماسکو: روس نے اقوام متحدہ کا اناج معاہدے میں دوبارہ شمولیت کا مطالبہ سختی سے مسترد کردیا۔ کریملن نے اقوام متحدہ کے سکریٹری جنرل انتونیو گوٹیرس کے مطالبے پر کہا کہ فی الحال روس کے لیے بحیرہ اسود کے اناج معاہدے پر واپس آنا ناممکن ہے کیونکہ روسی مفادات پر عمل درآمد نہیں کیا جا رہا۔ کریملن کے ترجمان دمتری پیسکوف نے کہا کہ اگر معاہدے کے روس سے متعلق حصے کا احترام کیا جائے تو معاہدے کو بحال کیا جا سکتا ہے۔ روسی سلامتی کونسل کے سکریٹری نکولائی پیٹروشیف کا کہنا ہے کہ ماسکو کے خلاف پابندیوں سے خوراک کی عالمی منڈی کے لیے تباہ کن نتائج کا خطرہ ہے۔ انہوں نے مزید کہا کہ خوراک کی حفاظت سے متعلق مسائل اس وقت تک حل نہیں کیے جاسکتے جب تک روس کے کاروبار میں مغرب کی ناجائز رکاوٹوں کو دور نہیں کیا جاتا۔