پڑوسی ممالک سے تنازعہ کو تعاون میں بدل دینا چاہئے، ولی امر مسلمین

تہران : ولی امر مسلمین آیت اللہ العظمی سید علی خامنہ ای نے کہا ہے کہ ہمیں اپنے کسی پڑوسی کے ساتھ تنازعہ میں نہیں رہنا چاہیے۔ ہر تنازعہ کو تعاون میں بدلنا چاہیے۔ یہ قابل عمل ہے اور پہلے ہی کسی حد تک ہو چکا ہے۔ انہوں نے مختلف ممالک کے ساتھ رابطے کے مواقع کو جاننا اور ان کو بروقت استعمال کرنا ضروری قرار دیا۔ کابینہ کے اراکین سے ملاقات میں ولی امر مسلمین نے کہا کہ بعض ممالک کے ساتھ حکومت کی متعدد اور طویل المدتی تعاون کی دستاویزات کو حتمی شکل دینا ضروری ہے۔ مفاہمت اور معاہدوں کو صرف کاغذ پر نہیں رہنا چاہیے۔ انہوں نے کہا کہ اللہ کی خوشنودی اور عوام کی خدمت حکومتوں کا نعرہ ہونا چاہئے۔ انہوں نے مغربی پابندیوں کا اصل ہدف عوام کی روزی روٹی اور اسے یرغمال بنانے کو قرار دیتے ہوئے کہاکہ پابندیوں کے خاتمے کے میدان میں کام اور مذاکرات جاری ہیں جو اپنی جگہ درست اور محفوظ ہیں لیکن اس کے متوازی طور پر، غیرجانبدار پابندیوں کی پیروی کی جانی چاہیے، جو کہ سب سے اہم اشارے ہے۔