Raza Musani 
پراگ : ہند رجب فاؤنڈیشن نے چیک جمہوریہ میں ایک اور اسرائیلی فوجی کے خلاف جنگی جرائم اور نسل کشی کے الزامات پر فوجداری شکایت دائر کر دی ہے۔
ہند رجب فاؤنڈیشن نے بتایا کہ اس نے اسرائیلی فوج کے رکن ہگے مونسانیگو کے خلاف پراگ میں ہائی پبلک پراسیکیوٹر آفس میں فوجداری شکایت جمع کرائی ہے۔ تنظیم کے مطابق شکایت اس تصدیق کے بعد دائر کی گئی کہ ملزم اس وقت چیک جمہوریہ کے دارالحکومت پراگ میں موجود ہے۔ بیان میں کہا گیا کہ یہ غزہ میں مبینہ جرائم پر چیک جمہوریہ میں دائر کی جانے والی تیسری شکایت ہے۔ فاؤنڈیشن کا کہنا ہے کہ یہ کیس اب محض قانونی نظریے کا امتحان نہیں بلکہ ریاستی عمل کو جانچنے کی کوشش ہے۔ شکایت میں مونسانیگو پر غزہ میں اسرائیلی فوجی کارروائی کے دوران نسل کشی، جنگی جرائم اور شہریوں پر مظالم کے الزامات عائد کیے گئے ہیں۔تحقیقات کے مطابق فوجی دسمبر 2023 سے نومبر 2025 تک غزہ میں تعینات رہا۔
