کینیڈا کے ہندوستان پر الزامات، امریکا، برطانیہ، آسٹریلیا کو بھی سخت تشویش

واشنگٹن: کینیڈا کے ہندوستان پر سکھ رہنما کے قتل میں ملوث ہونے کا الزام سے شروع ہونیوالا سفارتی تنازع شدت اختیار کر گیا۔ امریکا۔ برطانیہ اور آسٹریلیا نے بھی سخت تشویش کا اظہار کردیا۔ وائٹ ہاؤس سکیورٹی کونسل کی ترجمان ایڈرین واٹسن نے ایک بیان میں کہاکہ ہمیں ان الزامات پر شدید تشویش ہے جن کا اظہار جسٹن ٹروڈو نےکیا ہے۔ ترجمان نے کہاکہ ہم کینیڈا میں اپنے پارٹنرز کے ساتھ رابطے میں ہیں اور یہ ضروری ہے کہ کینیڈا کے تحقیقات آگے بڑھیں اور ملزمان کو انصاف کے کٹہرے میں لایا جائے۔ امریکا نے ہندوستان پر زور دیاکہ وہ الزامات کی تحقیقات میں تعاون کرے۔ برطانوی وزیراعظم رشی سونک کے ترجمان نےکہا کہ برطانوی حکومت سنجیدہ الزامات پر کینیڈا کے ساتھ رابطےمیں ہے تاہم اس کا ہندوستان اور برطانیہ کے درمیان جاری تجارتی مذاکرات پر کوئی اثر نہیں پڑے گا۔ آسٹریلوی وزرات خارجہ کے ترجمان کا بھی کہنا ہے کہ آسٹریلیا کو ان الزامات پر شدید تشویش ہے۔ ہم اپنے پارٹنر کے ساتھ اس معاملے پر قریبی رابطے میں ہیں۔ ہم نے ہندوستان سے اپنی تشویش کوسینئر لیول پر شیئر کیا ہے۔