Raza Musani 
جوہانسبرگ: پانچ ملکی گروپ برکس نے سعودی عرب اور ایران سمیت چھ ممالک کو رکنیت کی دعوت دیدی۔ سعودی عرب، ایران، ارجنٹینا، مصر، ایتھوپیا اور متحدہ عرب امارات یکم جنوری سے باقاعدہ برکس کے رکن بن جائیں گے۔ جوہانسبرگ میں تین روزہ سربراہ اجلاس میں برکس میں توسیع کی منظوری دی گئی۔ ادائیگیوں کے لیے نئی کرنسی کے قیام پر غور کی قرارداد بھی منظور کرلی گئی ہے۔ روسی صدر ولادیمیر پیوٹن نے برکس کی توسیع کے اعلان کا خیرمقدم کیا ہے۔ چین کے صدر شی جن پنگ نے کہا ہے کہ برکس رکن ممالک پر عالمی امن اور ترقی کی اہم ذمے داریاں ہیں، برکس تنظیم کی توسیع برکس کوپ میکانزم کو نئی تحریک دے گی۔ ایرانی صدر ابراہیم رئیسی نے کہا کہ ایران نے اپنی خارجہ پالیسی میں دنیا کے تمام آزاد ممالک کے ساتھ تعلقات کے فروغ کو اپنے ایجنڈے میں رکھا ہے۔ ایتھوپیا نے برکس میں شمولیت کو عظیم لمحہ قرار دیدیا۔
