سینیٹ سے متنازعہ ناموسِ صحابہؓ، اہلبیؑت و امہات المومنینؓ بل منظور

اسلام آباد: سینیٹ نے متنازعہ ناموسِ صحابہؓ، اہلبیؑت و امہات المومنینؓ بل 2023 کی منظوری دیدی۔ سینیٹ میں یہ بل جماعت اسلامی کے سینیٹر مشتاق احمد خان نے متعارف کرایا۔ سینیٹر مشتاق احمد خان نے کہاکہ اس بل میں توہین کرنے والے کی سزا کو بڑھا دیا گیا ہے کہ کوئی بھی اہل بیت اطہار(ع) اور صحابہ کرام(رض) کی شان میں گستاخی نہ کرے۔ بل کے تحت توہین پر سزا کو 3 سال سے بڑھا کر عمر قید کردیا گیا ہے جبکہ کم سے کم سزا 10سال ہوگی۔ جرم کو ناقابل ضمانت قرار دیا گیا ہے۔ سینیٹر مولانا عبدالغفور حیدری اور سینیٹر مولانا فیض محمد نے کہاکہ جو بھی اس بل کے حق میں ووٹ دیگا میدان حشر میں یہ زمین اس کی گواہی دے گی، سینیٹر پروفیسر ساجد میر نے کہاکہ یہ بل فرقہ ورانہ ہم اہنگی میں اضافہ کرے گا۔ سینیٹر شیر ی رحمن نے کہاکہ عجلت میں بل منظور نہ کریں ایسا نہ ہو کہ مذہب کے نام پر بغیر دیکھے بل پاس کردیں۔ اس موقع پر کئی ارکان نے شور کیا تاہم بل کے محرک نے ووٹنگ کرانے کا مطالبہ کیا جس پر چیئرمین سینیٹ نے بل پر اراکین سے شق وار رائے لینے کے بعد اسے منظور کر لیا۔