جلوسوں پر حملے اور مقدمات کسی صورت قبول نہیں، زہرا نقوی

لاہور : مجلس وحدت مسلمین شعبہ خواتین کی مرکزی سیکریٹری جنرل و رکن پنجاب اسمبلی سیدہ زہراء نقوی نے لاہور میں عہدیدار خواتین سے خطاب میں ملک کے مختلف شہروں میں عزاداری مظلوم کربلا پر حملے اور پُرامن عزاداروں پر آیف آئی آرز کاٹنے، پنجاب، جی بی اور آزاد کشمیر سمیت ملک کے دیگر علاقوں میں متشدد گروہوں کا جلوس ہائے عزاء پر پتھراؤ، خواتین پر ایف آئی آرز کاٹنے اور عزاداری میں رکاوٹ ڈالنے والے عناصر کی شدید الفاظ میں مذمت کی۔ ان کا کہنا تھا کہ عزاداری امام حسین علیہ السلام ہمارے ایمان کا حصہ ہے اور اس سے ہم کسی صورت دستبردار نہیں ہونگے۔ زہراء نقوی کا کہنا تھا کہ ملک میں تمام شیعہ سنی مل کر شہدائے کربلا کی یاد مناتے ہیں، ان کے نام کی سبیلیں لگاتے ہیں، نیاز اور لنگر تقسیم کرتے ہیں، حتی کہ ہندو اور مسیحی برادری بھی امام حسین علیہ السلام سے عقیدت اور عشق کا اظہار کرنے کیلئے مجالس و جلوسوں میں شریک ہوتی ہے سیدہ زہراء نقوی نے کہا کہ ناصبی گروہ جلوسوں پر حملہ کرکے ملک کے امن و امان کو تباہ کر رہے ہیں اور حالات کو خرابی کی طرف لے جا رہے ہیں، ایسے متشدد عناصر کو قانون کے کٹہرے میں لایا جائے۔ ان کا کہنا تھا کہ بے گناہ عزاداران پر جو ایف آئی آرز کاٹی گئی ہیں، انہیں فی الفور واپس لیا جائے۔ امام حسین علیہ السلام نہ صرف مسلمانوں بلکہ انسانیت کی نجات کا ذریعہ ہیں اور تمام شیعہ سنی طبقات ان کی یاد عقیدت و احترام سے مناتے ہیں۔ انہوں نے کہا کہ حکومت سے اپیل ہے کہ ملک میں امن و امان کی صورتحال برقرار رکھنے کے لیے شرپسند عناصر کیخلاف سخت ایکشن لے اور قانون کی بالا دستی کو یقینی بنائے۔