غزہ میں گذشتہ رات بھی صیہونی جنگی طیاروں کے حملے، 55 افراد شہید، مجموعی تعداد 44 سو سے تجاوز

غزہ: غزہ میں گذشتہ رات بھی صیہونی جنگی طیاروں کے حملے جاری رہے۔ حملوں میں 55 افراد شہید اور کئی زخمی ہوگئے۔
صیہونی جنگی طیاروں نے النصیرات کیمپ میں شاپنگ پلازہ کو میزائلوں سے نشانہ بنایا. حملے میں نو افراد شہید اور درجنوں زخمی ہو گئے۔ خان یونس میں گھر پر حملے میں دو خواتین اور بچے سمیت تین افراد شہید ہوئے۔ صیہونی فوج نے شمالی غزہ میں رات بھر پچاس سے زائد حملے کئے اور رہائشی عمارتوں کو نشانہ بنایا۔ تیس سے زائد مکانات تباہ ہوگئے۔ درجنوں افراد زخمی ہیں۔ ادھر اسرائیلی فوج نے اعلان کیاہے کہ وہ حملے کے اگلے مرحلے کی تیاری کے لیے غزہ پر اپنے حملوں کو تیز کرنے جا رہی ہے۔ فوجی ترجمان جنرل ڈینیل ہگاری نے کہا کہ ہمیں جنگ کے اگلے مرحلے میں بہترین ممکنہ حالات میں داخل ہونا چاہیے۔ آج سے ہم حملوں کو تیز کر رہے اور خطرے کو کم کر رہے ہیں۔ اسرائیلی فوج نے فلسطینیوں کو غزہ شہر چھوڑنے کا حکم دے دیا۔ غزہ میں موبائل فون پر پیغام آرہے ہیں کہ کوئی بھی شخص جو غزہ شہر سے نہ گیا اسے دہشت گرد تصور کیا جائے گا۔ اور اسے نتائج بھگتنے ہوں گے۔ صیہونی حملوں میں شہید افراد کی تعداد 44 سو تک جاپہنچی ہے۔ جبکہ 13 ہزار سے زائد زخمی ہیں۔