Raza Musani 
کراچی: زمینی راستے سے زائرین کے کربلا جانے پر پابندی کے خلاف مجلس وحدت مسلمین کا اربعین مارچ عارضی طور پر روک دیا گیا ہے۔ رات گئے گورنر سندھ کامران ٹیسوری نے ایم ڈبلیو ایم کے رہنماؤں کو یقین دہانی کرائی ہے کہ ان کے مطالبات آج دوپہر تک حل کرانے کی ہر ممکن کوشش کریں گے۔ کامران ٹیسوری کا کہناہے کہ وہ کوشش کریں گے عراقی ویزے کی مدت میں اضافہ کرائیں اور جہاز کے رعایت ٹکٹ دلوائیں۔ ایم ڈبلیو ایم کے رہنما علامہ احمد اقبال رضوی نے کہا کہ حکومت نے اگر زمینی راستے پر پابندی لگائی ہے تو متبادل راستے کا انتظام کرے۔
اس سے پہلے کراچی اور اندرون سندھ سے آنیوالے زائرین کے قافلے انچولی شاہراہ پاکستان پہنچے اورایم ڈبلیو ایم کے سربراہ علامہ راجہ ناصرعباس کی زیر قیادت اربعین مارچ کا آغاز کیا۔ اس دوران حکومتی سطح پر مذاکرات کا سلسلہ بھی جاری رہا۔ بعد ازاں تمام قافلے رات گئے نمائش چورنگی پہنچے جہاں گورنر سندھ کامران ٹیسوری نے پہنچ کر علامہ راجہ ناصر عباس اور ایم ڈبلیو ایم کے قائدین اور قافلہ سالاروں سے مذاکرات کئے۔
