خطے میں اسلحے کی دوڑ کسی کے مفاد میں نہیں، ایرانی وزیر خارجہ

تہران: ایرانی وزیر خارجہ حسین امیر عبداللہیان نے مغربی ایشیائی ممالک کے درمیان مسائل کو باہمی تعاون سے حل کرنے پر زور دیتے ہوئے کہا کہ اسلحے کی دوڑ کسی کے مفاد میں نہیں۔ ایران اور عرب ممالک بات چیت کا مرحلہ عبور کرکے تعاون کے مرحلے میں داخل ہوگئے ہیں۔ انہوں نے کہا کہ صدد رئیسی کی حکومت ہمسایہ ممالک کے ساتھ تعلقات اور تعاون کو خصوصی اہمیت دیتی ہے۔ عبداللہیان نے کہا کہ خطے کی سیکیورٹی کو یقینی بنانے کے لیے تمام ممالک کو مل کر تعاون کرنا ہوگا۔ ایک ملک کے حالات خراب ہونے سے پورا خطہ متاثر ہوگا۔ انہوں نے ایران اور سعودی عرب کے درمیان بہتر تعلقات کو خطے کے مفاد میں قرار دیتے ہوئے کہا کہ دونوں ممالک خطے میں امن کے قیام اور تعاون بڑھانے میں اہم کردار ادا کرسکتے ہیں۔انہوں نے کہا کہ ایران اور بحرین تعلقات کو بہتر بنانے کے حوالے سے کام کررہے ہیں۔