Raza Musani 
تہران : ایران کے وزیرِ خارجہ عباس عراقچی نے امریکہ سے مطالبہ کیا ہے کہ وہ ایرانی عوام اور اُن کے منتخب حکومتی نظام کا احترام کرے۔
الجزیرہ کو دیے گئے انٹرویو میں عباس عراقچی نے کہا کہ ایران کی حیثیت کا فیصلہ صرف ایرانی عوام کا حق ہے۔ انہوں نے واضح کیا کہ امریکہ کو ایران اور اُس نظام کا احترام کرنا چاہیے جسے عوام نے جمہوری انتخاب کے ذریعے چُنا ہے۔ وزیرِ خارجہ نے کہا کہ ایران کو امریکہ کے ساتھ مذاکرات کے حوالے سے طویل عرصے سے عدم اعتماد کا سامنا رہا ہے۔ واشنگٹن نے ماضی میں مذاکرات میں سنجیدگی اور خلوص کا مظاہرہ نہیں کیا۔ عباس عراقچی نے ایران پر عائد طویل پابندیوں کو مثال بناتے ہوئے کہا کہ اقتصادی دباؤ مسائل حل کرنے میں ناکام رہا ہے۔فوجی طاقت بھی پائیدار نتائج نہیں لا سکتی۔ ان کا کہنا تھا کہ بمباری عمارتیں اور آلات تباہ کر سکتی ہے، مگر علم، ٹیکنالوجی اور کسی قوم کے عزم کو ختم نہیں کیا جا سکتا۔ وزیرِ خارجہ نے اسرائیل کے ایک اور ممکنہ حملے کے بارے میں دعوؤں کو نفسیاتی جنگ قرار دیتے ہوئے کہا کہ یہ ایران میں خوف پھیلانے کی کوشش کا حصہ ہے۔
