اللہ نے مسلمانوں کو متحد رہنے کا حکم دیا ہے، خطبہ حج

مکہ مکرمہ : امام کعبہ شیخ یوسف زبن محمد سعید نے خطبہ حج میں کہا ہے کہ اللہ تعالیٰ نے مسلمانوں کو متحد ہوکر رہنے کا حکم دیا ہے اور فرقہ فرقہ ہونے سے منع فرمایا ہے۔ مسجد نمرہ سے خطبہ حج میں شیخ یوسف بن محمد سعید نے کہاکہ تمام مسلمانوں کو چاہیے کہ وہ متحد ہوجائیں۔ مل جل کر بیٹھنا نجات اور جدا ہونا عذاب ہے۔ انہوں نے کہاکہ توحید کی دعوت تمام نبیوں میں مشترک رہی۔ اللہ ایک ہے اس کے سوا کوئی عبادت کے لائق نہیں ہے۔اللہ کی عبادت ایسے کرو کہ وہ تمہیں دیکھ رہا ہے۔ خطبہ حج دیتے ہوئے شیخ یوسف بن محمدکا کہنا تھا اللہ عظیم ہے اور حکمت والا ہے، اللہ رب العزت نے تفرقے سے منع فرمایا، قرآن میں اتحاد کی اہمیت کو بیان کیا گیا ہے، اتحاد میں ہی دین و دنیا کے معاملات میں فلاح ہے، مسلمانوں کا آپس میں مل کر رہنا ضروری ہے۔ہمیں حکم دیا گیا اختلاف ہوجائے تو قرآن اور سنت کی طرف جائیں، قرآن کریم میں مسلمانوں کے لیے جڑ کر رہنے کا حکم ہے۔ امام کعبہ کا کہنا تھا کہ اچھے اخلاق سے دوسروں کے دل میں جگہ پیدا ہوجاتی ہے، مسلمانوں کے لیے ضروری ہے اچھے اخلاق رکھیں۔ میدان عرفات میں حج کا رکن اعظم وقوف عرفہ ادا کرنے کے بعد عازمین نے ظہر و عصر کی نمازیں یکجا کرکے ادا کیں۔ اور اذان مغرب کے بعد میدان عرفات سے مزدلفہ روانہ ہوئے جہاں انہوں نے نماز مغرب اور عشاء ملا کر ادا کی اور پوری رات مزدلفہ میں کھلے آسمان تلے عبادت اور ذکر و اذکار کرتے ہوئے گذاری۔