پاکستانی زائرین کے لئے ریمدان بارڈر سے عراق بارڈر تک فضائی سروس کا اعلان

تہران : ایرانی اربعین کمیٹی کے سربراہ نے ریمدان بارڈر کے دورے کے دوران اعلان کیا ہے کہ پاکستانی زائرین کو جہاز کے ذریعے چابہار سے اہواز منتقل کیا جائے گا۔ انہوں نے کہاکہ پاکستانی زائرین پاکستان کے دور دراز علاقوں سے ریمدان پہنچتے ہیں ان کی سہولیات کے لیے اسلامی جمہوریہ ایران نے یہ اقدام اٹھایا ہے۔ اربعین کمیٹی کے سربراہ کے اعلان کے بعد مقامی اعلیٰ حکام نے ریمدان بارڈر پر موجود جامعۃ المصطفی العالیہ کے نمائندوں سے ملاقات کے دوران فوری سروس شروع ہونے کا اعلان کیا ہے۔ مقامی اعلیٰ حکام کے مطابق، چابہار سے اہواز تک بس سے بھی کم کرایے میں زائرین کو عراقی بارڈر تک پہنچانے کا فیصلہ کیا گیا ہے۔