Raza Musani 
کابل: افغانستان کے قومی ہیرو احمد شاہ مسعود کے بیٹے احمد مسعود جونیئر نے طالبان سے مذاکرات پر مشروط آمادگی ظاہر کردی، احمد مسعود نے عرب اخبار الشرق الاوسط سے گفتگو میں کہا کہ انہيں طالبان کے ساتھ صلح اور مشترکہ حکومت میں دلچسپی ہے لیکن زور زبردستی قبول نہیں کریں گے، وہ صلح کے لئے اپنے والد کے خون کو بھی فراموش کرنے پر تیار ہيں کیونکہ انہيں افغانستان کی پائیداری اور سیکیورٹی سے دلچسپی ہے، طالبان، ہتھیاروں کے زور پر اپنی خواہش مسلط کرنا چاہتے ہيں اور یہ چیز ہم قبول نہيں کر سکتے، ہم جنگ کے خواہاں نہیں ہیں لیکن اگر طالبان پنج شیر میں داخل ہوئے تو ہم ان سے جنگ کریں گے ، وہ بغیر ہتھیار کے آرام سے یہاں آ سکتے ہيں لیکن اگر بندوق کے ساتھ آئے تو ہم آخری مرد تک اپنا دفاع کریں گے ان حالات میں امن کو ایک موقع دیا جانا چاہیے بھلے وہ اس کے لئے طالبان کے ساتھ صلح ہی کیوں نہ کرنا پڑے، شمالی افغانستان کا پنج شیر اب بھی طالبان کے تسلط سے بچا ہوا ہے ۔
