Raza Musani 
اسلام آباد: پاکستان اور ترکیہ سمیت سولہ ممالک نے اسرائیل کو خبردار کیاہے کہ گلوبل صمود فلوٹیلا کے خلاف جارحانہ کارروائی برداشت نہیں کی جائے گی۔ جہازوں پر حملہ یا شرکاء کی گرفتاری بین الاقوامی قوانین کی سنگین خلاف ورزی تصور ہوگی۔
پاکستان، ترکیہ، بنگلہ دیش، برازیل، کولمبیا، انڈونیشیا، آئرلینڈ، لیبیا، ملائشیا، مالدیپ، میکسیکو، قطر، عمان، سلوینیا، جنوبی افریقہ اور اسپین سمیت سولہ ممالک کے وزرائے خارجہ نے مشترکہ بیان جاری کیا ہے۔ بیان میں کہاگیا ہےکہ فلوٹیلا کا ہدف غزہ میں انسانی امداد کی فراہمی اور فلسطینی عوام کی فوری انسانی ضروریات اور غزہ میں جنگ کو روکنے کی ضرورت کے بارے میں بیداری پیدا کرنا ہے۔ بیان میں غزہ میں جنگ بند کرنے کی ضرورت پر زور دیتے ہوئے کہا گیا کہ امن، انسانی امداد اور عالمی قوانین کا احترام مشترکہ مقاصد ہیں۔
مشترکہ بیان میں مزید کہا گیا ہے کہ بین الاقوامی اور انسانی قوانین کا احترام ضروری ہے بین الاقوامی پانیوں میں جہازوں پر حملہ یا غیرقانونی حراست احتساب کے زمرے میں آئے گی۔
