Raza Musani 
ریاض : ایران نے سات سالہ بندش کے بعد سعودی عرب میں اپنا سفارتخانہ کھول دیا۔ سعودی دارالحکوت ریاض میں ایرانی سفارت خانے میں پروقار تقریب کا انعقاد کیا گیا، جس کا آغاز ربن کاٹنے سے کیا گیا۔ تقریب میں سعودی عرب اور ایرانی وزارت خارجہ کے خصوصی نمائندوں اور اعلیٰ حکام سمیت سعودی عرب کیلئے نامزد ایرانی سفیر علی رضا عنایتی اور ریاض میں متعین غیر ملکی سفیروں نے بھی شرکت کی۔ ایران کے معاون وزیر خارجہ علی رضا نے کہا کہ آج کے دن کو ہم سعودی ایرانی تعلقات کی تاریخ کا اہم دن سمجھتے ہیں۔ ان کا کہنا تھا کہ دونوں ممالک کے درمیان تعاون ایک نئے دور میں داخل ہو رہا ہے۔ انہوں نے کہاکہ سفارتکاری رابطے کا بہترین ذریعہ ہے۔ ترقی، امن، استحکام اور مشترکہ افہام و تفہیم تک رسائی کے لیے بین ملکی مکالمہ آپشن نہیں بلکہ یقینی ضرورت ہے۔ واضح رہے کہ یہ قدم سعودی عرب اور ایران کے درمیان چین کی ثالثی میں ہونے والے معاہدے کے تحت سامنے آیا ہے۔
