Raza Musani 
کابل : طالبان حکومت نے پاکستان کو ایک بار پھر یقین دہانی کرائی ہے کہ افغان سرزمین کسی بھی ملک کے خلاف استعمال نہیں ہوگی۔ پاکستانی نمائندے آصف درانی نے کابل میں طالبان وزیرخارجہ امیر خان متقی سے ملاقات کی۔ ملاقات میں دو طرفہ تعلقات سمیت باہمی دلچسپی کے امور بھی زیر بحث لائے گئے۔ ملاقات میں اس بات پراتفاق کیا گیا کہ خطے میں امن سب کے مفاد میں ہے، سیکیورٹی معاملات پر دونوں ممالک ایک دوسرے سے مکمل تعاون کریں گے۔ مولوی امیر خان متقی نے پاکستان کو یقین دہانی کرائی ہے کہ ان کی حکومت علاقائی سلامتی اور استحکام کے لیے کام کرے گی۔اپنی سرزمین کو کسی بھی ملک کے خلاف استعمال نہیں ہونے دیں گے۔ امیرخان متقی نے آصف درانی کو نئی ذمہ داری سنبھالنے پر مبارک باد بھی پیش کی۔ یہ ملاقات ایسے وقت میں ہوئی ہے جب سرحد پر بڑھتی ہوئی جارحیت اور کالعدم تحریک طالبان پاکستان کے حملوں میں اضافے کی وجہ سے دونوں ممالک کے تعلقات کشیدہ ہیں۔
