پاکستان اور آئی ایم ایف کے درمیان اسٹاف لیول معاہدہ طے پاگیا

اسلام آباد: پاکستان اور آئی ایم ایف کے درمیان تین ارب ڈالر قرض کا اسٹاف لیول کا اسٹینڈ بائی معاہدہ طے پا گیا ہے۔آئی ایم ایف نے اپنے بیان میں معاہدے کی تصدیق کی اور بتایا کہ ایگزیکٹو بورڈ کی جانب سے جولائی کے وسط میں معاہدے کی منظوری دیے جانے کا امکان ہے۔ عالمی مالیاتی ادارے نے کہا ہے کہ پاکستان معاہدے کے لیے پہلے ہی پیشگی شرائط پر عملدرآمد کر چکا ہے۔ مشن نے اس حوالے سے ٹیکس نیٹ ورک کو بڑھانے اور اگلے مالی سال کے بجٹ کی منظوری کی مثالیں دی ہیں۔ آئی ایم ایف نے بیان میں پاکستان سے افراط زر کو قابو میں رکھنے کے لیے اقدامات اٹھانے پر زور دیا ہے تا کہ عام آدمی پر بوجھ کم کیا جا سکے۔ عالمی مالیاتی فنڈ نے امید ظاہر کی ہے کہ پاکستان اب دیگر فورمز سے بھی قرضے حاصل کر سکے گا جس سے اسے معاشی استحکام کی طرف بڑھنے میں مدد مل سکے گی۔