Raza Musani 
تل ابیب : صیہونیوں کے اسرائیل سے نقل مکانی کے رجحان میں غیر معمولی اضافہ ہوا ہے۔ اسرائیلی ویب سائٹ وائی نیٹ نیوز نے رپورٹ دی ہے کہ اسرائیلی دارالحکومت تل ابیب میں یورپی سفارت خانوں میں حالیہ مہینوں کے دوران پاسپورٹ یا امیگریشن ویزا کیلئے درخواست دینے والوں کی تعداد میں غیر معمولی اضافہ ریکارڈ کیا گیا ہے۔ رپورٹ کے مطابق فرانس، ہالینڈ، رومانیہ، پرتگال، اسپین، جرمنی، اٹلی اور بالٹک ریاستوں کے سفارتی مشنوں کے باہر لمبی قطاریں دیکھی جارہی ہیں۔ زیادہ سے زیادہ اسرائیلی خاندان پاسپورٹ کی درخواست کر رہے ہیں۔ ہسپانوی سفارتخانے نے تصدیق کی ہے کہ گزشتہ تین سال میں پاسپورٹ کی درخواستوں, نقل مکانی، کام کرنے اور رہائش کے ڈیجیٹل ویزوں کی تعداد میں اضافہ ہوا ہے۔ ایک یورپی ایلچی نے کہا ہے اس کی وجہ متنازع عدالتی قانون ہے جبکہ دوسروں کا خیال ہے کہ اس کی وجہ مہنگائی ہے۔ گذشتہ ماہ اسرائیل کے چینل 13 کے سروے میں یہ بات سامنے آئی تھی کہ 28 فیصد اسرائیلی مقبوضہ علاقے چھوڑنے پر غور کر رہے ہیں۔
