Raza Musani 
نیویارک: امریکا کے سب سے بڑے شہر نیویارک میں ایک تاریخی لمحہ آیا ہے جہاں 34 سالہ ڈیموکریٹ رہنما ظہران ممدانی نے قرآنِ مجید پر حلف اٹھا کر میئر کا عہدہ سنبھال لیا۔
ظہران ممدانی نیویارک کے پہلے مسلمان، پہلے جنوبی ایشیائی اور پہلے افریقی نژاد میئر بن گئے ہیں، جب کہ یہ تقریب شہر کی سیاسی تاریخ میں ایک نمایاں علامتی حیثیت اختیار کر گئی ہے، حلف اٹھانے کے بعد ظہران ممدانی نے کہا کہ نیویارک کے عوام کو نئے سال کی مبارکباد، میئر نیویارک کا حلف اٹھانا میرے لیے اعزاز کی بات ہے۔ نیو یارک کے نو منتخب میئر ظہران ممدانی نے آدھی رات کو سٹی ہال کے نیچے واقع ایک طویل عرصے سے بند سب وے اسٹیشن میں اپنے عہدے کا حلف اٹھایا، جہاں انہوں نے اسلام کی مقدس کتاب قرآنِ مجید پر ہاتھ رکھ کر ذمہ داریاں سنبھالیں، یہ پہلا موقع ہے کہ نیویارک سٹی کے کسی میئر نے قرآن پر حلف لیا ہے، جب کہ ماضی میں زیادہ تر میئرز بائبل پر حلف اٹھاتے رہے ہیں، آئینی طور پر کسی مذہبی کتاب کا استعمال لازم نہیں۔
