Raza Musani 
واشنگٹن: انسانی حقوق کی خلاف ورزیوں پر پاکستانی آرمی چیف پر پابندی کا بل امریکی ایوان نمائندگان میں پیش کردیا گیا۔ پاکستان ڈیموکریسی ایکٹ کے نام سے یہ بل جنوبی کیرولائنا سے کانگریس کے ریپبلکن رکن جو ولسن اور کیلیفورنیا سے ڈیموکریٹ رکن جمی پنیٹا نے پیش کیا۔ بل مزید غور و خوض کے لیے خارجہ امور اور عدالتی کمیٹیوں کو بھیج دیا گیا ہے۔ مجوزہ بل میں کہا گیا ہے کہ اگر پاکستان نے انسانی حقوق کی صورتحال کو بہتر بنانے کے لیے اقدامات نہ کیے تو 180 دن کے اندر پاکستانی آرمی چیف پر پابندیاں عائد کی جائیں گی۔ بل کے مسودے میں یہ مطالبہ بھی کیا گیا ہے کہ وہ پاکستان میں سیاسی مخالفین کو دبانے میں ملوث اہم افراد کی نشاندہی کرے اور انہیں پابندیوں کی فہرست میں شامل کرے۔ بل میں کہا گیاہے کہ اگر پاکستان حکمرانی میں فوجی مداخلت بند کر دیتا ہے اور تمام غلط طور پر حراست میں رکھے گئے سیاسی قیدیوں کو رہا کرتا ہے تو امریکی صدر کو پابندیاں اٹھانے کا اختیار ہوگا۔
