Raza Musani 
استنبول: پاکستان نے اسلاموفوبیا، فیک نیوز اور دیگر مسائل سے نمٹنے کے لئے سات اہم تجاویز پیش کردیں۔استبول میں او آئی سی وزارتی کانفرنس سے خطاب میں پاکستانی وزیر اطلاعات مریم اورنگزیب نے کہاکہ اجتماعی سیاسی ومعاشی وزن ڈالنے سے دنیا بھر میں مسلمان اقلیت کے حقوق کا تحفظ ممکن ہوسکتا ہے۔ اطلاعات پر دانستہ کنٹرول کے ذرائع سے اسلام اور مسلمانوں کے تشخص کے بارے میں خاص سوچ پھیلائی جارہی ہے. بہت سارے مسلمان ممالک میں آزاد میڈیا کام کررہا ہے جس نے عوام کے ذہنوں میں جگہ بنالی ہے۔ ایسے قوانین کی ضرورت ہے جس کے تحت نفرت پھیلانے اور دھوکہ دہی کرنے والوں کی نشاندہی ہو اور انہیں سزا مل سکے، ان اقدامات کے ساتھ ساتھ بنیادی آزادیوں کا تحفظ یقینی بنانا ہوگا۔ انہوں نے کہاکہ جمہوریت کے مزید فروغ، عوام کی زیادہ سے زیادہ شرکت، اجتماعیت میں اضافے اور اظہار رائے کی آزادی پر توجہ مرکوز کی جائے،حساس مگر عالمی سطح پر نمایاں ہونے والے یہ موضوعات ہمار ہداف ہونا چاہئے جنہیں مسلمانوں اور مسلمان ممالک کے خلاف غلط اور گمراہ کن نیت سے استعمال کیاجاتا ہے ہمیں فیک نیوز کا سچی خبروں کے ذریعے مقابلہ کرنا ہوگا۔
