اسرائیلی حملوں اور فائرنگ سے مزید 6 فلسطینی شہید، 7 زخمی

غزہ : غزہ میں جنگ بندی کے باوجود اسرائیل کے فضائی اور زمینی حملوں کے نتیجے میں مزید پانچ فلسطینی شہید اور سات زخمی ہو گئے۔ جبکہ ایک فلسطینی کو غرب اردن میں شہید کیا گیا۔ خان یونس میں بنی سہیلہ چوک کے قریب اسرائیلی ڈرون حملے میں ایک فلسطینی شہید اور دوسرا زخمی ہوگیا۔
ادھر محلہ الزیتون کے مشرقی علاقے میں اسرائیلی فوجی گاڑیوں نے فائرنگ کرکے دو فلسطینی شہید کردئے۔ وسطی غزہ میں المغازی پناہ گزین کیمپ کے داخلی راستے پر اسرائیلی فضائی حملے میں دو فلسطینی شہید اور کئی زخمی ہوگئے۔ اسرائیلی توپ خانے نے رفح کے جنوبی مضافات کو بھی مسلسل نشانہ بنایا۔ جنگ بندی معاہدہ نافذ ہونے کے بعد اب تک شہید فلسطینیوں کی تعداد 441 تک پہنچ چکی ہے۔ جبکہ 1,223 فلسطینی زخمی ہوچکے ہیں۔ غرب اردن کے جنوبی شہر الخلیل میں قابض اسرائیلی فوج کی فائرنگ سے فلسطینی شہری شاکر فلاح احمد الجعبری شہید ہوگئے.