داعش کے 50 دہشت گرد شام سے عراقی حکام کے حوالے

موصل: داعش کے پچاس دہشت گردوں اور اہل خانہ کے 168 افراد کو شام سے عراق منتقل کر دیا گیا۔ شامی ڈیموکریٹک فورسز کی جانب سے داعش کے 50 دہشت گردوں کو عراقی حکام کے حوالے کیا گیا۔ ان دہشت گردوں سے تحقیقات کی جائیں گی اورعراقی قانون کے مطابق نمٹا جائے گا۔ ادھر داعشی خاندانوں کے 168 افراد کو شام کے الحول کیمپ سے عراقی شہر موصل میں واقع الجادہ کیمپ بھجوایا گیا ہے جہاں ان کا نفسیاتی علاج بھی کیا جائے گا۔ عراقی حکام کے مطابق قبائلی عمائدین کی جانب سے انتقامی کارروائی نہ کرنے کی یقین دہانی کے بعد ہی ان افراد کو اپنے گھروں کو بھیجا جائے گا۔ کردوں کے زیر قبضہ شمال مشرقی شام میں واقع الحول کیمپ میں 50 ہزار افراد رہائش پذیر ہیں جن میں سے چند کا تعلق مشتبہ دہشت گردوں سے بتایا جاتا ہے۔ اس کیمپ میں شام سے بے گھر ہونے والے افراد بھی پناہ لیے ہوئے ہیں جبکہ عراقی مہاجرین کے علاوہ 60 ممالک سے تعلق رکھنے والے غیر ملکی بھی شامل ہیں۔